Associated News Agency
الأحد 27 أيار 2018

حقيبة الإتحاد

1 | 2 | 3 | 4 | 5 | 6 | 7 | 8 | 9 |

عبد السميع اللميع وقانون "سد بوزك وانتخب"

محمد سلام، السبت 5 أيار 2018

لوّح لي بيده، من دون سلام أو كلام، على غير عادته وأسرع الخطى نحو فرن المعجنات حيث نطق عبارة "مشروحة زعتر" وسكت مع أن "البروفسور" عبد السميع اللميع عادة يتكلم 25 ساعة يومياً (25)، على الأقل محللاً الأوضاع السياسية المحلية والإقليمية والدولية ويناقش حتى في عمر ملكة بريطانيا.

لحقت به إلى دكان المعجنات ورميت عليه السلام مع "كيفك، وشو الأخبار اليوم يا عبد السميع؟"

وضع أصابع كفه على شفتية ثم قال "هسسسسسسسسسسسسسسس".

عجيب أمره عبد السميع اللميع. كررت سؤالي بصوت أعلى، فكرر الإشارة مع حس الهسسسسسسسسسسسسس.

"ولك شو قصتك، خرست؟" سألته بإستهزاء.

فنطق وقد إستفزه السؤال: "ولك سكوت أحسن ما يضبوك."

"ليش بدون يضبوني يا عبد السميع؟" سألته.

أجاب: "ممنوع الحكي. بلش تطبيق قانون سد بوزك وإنتخب. وإذا حكيت بيسجلولك عالكاميرا، وبيعملولك زبط وبيوقفوك عالمطار متل يللي عليهن زبوطة سير وما دافعينهن."

"بلا هل حكي يا عبد السميع، لا تسد بوزك ولا نيعك، وإحكي يللي بدك ياه. نحنا ببلد ديمقراطي حر، ما حدا بسد يوز حدا،" قلت له بلهجة جادة فيها مسحة من العتاب والتحدي، وصعّدت المواجهة بسخرية.

"مين قال لك إنو في قانون سد بوزك وإنتخب؟؟ شو هل طق الحنك."

فجن جنونه وصاح: "يعني إنتى بتفهم أكتر من يللي بالمكتب تبع المكنة الإنتخابية. هني قالوا لي سد بوزك وإنتخب، وما بقى تحكي أو تكتب عالتليفان(تيليفون) لبعد ما تطلع النتيجة. وبس تطلع النتيجة نحنى منقللك شو تحكي وشو تكتب."

أدركت ما يقصده البروفسور عبد السميع وحاولت أن أشرح له أنه يتحدث عن فترة "الصمت الإنتخابي" وأن هذه تطبق على المرشحين ولها علاقة بالإعلانات الإنتخابية، وليست لها علاقة بالناخبين. مشدداً على أن "الناس بيحكوا يللي بدهم ياه يا عبد السميع. نحنا ببلد يحترم الحريات."

كابر ورفض كل ما قلته وأصر على أن "القانون يطبق على الجميع. سد بوزك وإنتخب."

ضاق صدري بعبد السميع وقانونه، فقلت له "أنا لا يطبق علي هذا القانون لأنني لن أنتخب... أما حضرتك فيطبق عليك مفهوم معلمك لمقتضيات سد بوزك." وغادرته غاضباً.

فاجأني إذ سألني: "طيب شو يعني مقتضيات"؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

أجبته: "معك حق ما تفهمها هيدي لأنها مش من قاموسك يللي يبدأ ب سد بوزك ... وينتهي ب إنتخب"



(كلام سلامf)